Киргизүүд “Гиннес”-ийн номонд орж магадгүй   

Киргиз улс Ерөнхийлөгчид нэр дэвшигчдийн тоогоор "Гиннес”-ийн номонд орж магадгүй гэнэ. Энэ тухай тус улсын хэд хэдэн мэдээллийн агентлагууд мэдээлж байна. Өнөөдрийн байдлаар тус улсын Сонгуулийн төв хороонд 83 хүн Ерөнхийлөгчийн сонгуульд нэр дэвших өргөдлөө өгчээ.

Өмнө нь дэлхийн аль ч улсад болж байсан Ерөнхийлөгчийн сонгуульд ийм олон хүн нэр дэвшиж байсан түүх байдаггүй гэнэ. Тухайлбал, 2001 онд Беларусийн ерөнхийлөгчид нэр дэвшихээр 20 хүн бүртгүүлсэн бол, 2002 онд Францад 16 хүн Ерөнхийлөгчид өрсөлдөхөөр Сонгуулийн төв хороонд өргөдлөө өгч байжээ. Тэгвэл 2008 онд АНУ-ын Ерөнхийлөгчийн сонгуульд Барак Обама анх бүртгүүлж байсан 14 нэр дэвшигчээс ялалт байгуулж байв.

Киргизстанд Ерөнхийлөгчид нэр дэвшүүлэх хугацаа дуусгавар болсон. Ерөнхийлөгчид нэр дэвшсэн 83 хүний 67 нь хувиараа, 16 нь намаасаа нэр дэвшсэн байна. Нийт нэр дэвшигчдийн 77 эрэгтэй хүн аж. Нэр дэвшигчдээс 80 хүн Киргиз үндэстэн, хоёр нь орос, нэг нь казах юм байна. 45-аас доош насны 15, 60 хүртэлх насны 60, 60-аас дээш настай найман нэр дэвшигч байна.

Ерөнхийлөгчид нэр дэвшээд буй 83 хүний 19 нь одоогоор ажилгүй, 15 нь төрийн албан хаагч, 42 нь бизнес эрхлэгч, найм нь одоогийн парламентын, долоо нь өмнөх парламентын гишүүн аж. Нэр дэвшигчдийн дотор тэтгэвэрт гарсан нэг хүн байна. Одоо Ерөнхийлөгчид нэр дэвших хүмүүс сонгуулийн кампанит ажлаа санхүүжүүлэхийн тулд хувийн данс нээнэ.

Нэр дэвшигч Сонгуулийн төв хорооны тусгай дансанд 100 мянган сом (Киргизийн мөнгөн тэмдэгт) тушааж, өөрийгөө дэмжиж буй 30 мянган хүний гарын үсэг цуглуулах хэрэгтэй. Өнгөрсөн жил Киргизэд болсон парламентын сонгуульд 29 нам оролцож, сонгууль өгөх хуудасны урт 70 см-т хүрч байсан. Ерөнхийлөгчийн сонгууль ирэх аравдугаар сарын 30-нд болно.