Хорт утааны аятайхан баг байна уу?   

Есдүгээр cap гараагүй байхад л ингэж бодож эхэллээ. Хорооллын эцэс, долоон буудал, дөрвөн замаар оройн цагаар явахад униартсан цэнхэр хөшиг татаад эхэлчихжээ.

Машины яндангаас олгойтох сүүмгэр хөх утаанууд түнэр харанхуйн өнгөөр энд тэндээс олгойдож, гэр хорооллынхон пийшингээ галлаад "Угаарын сезон" хэдийнэ ирчихэж.

Энэ өвлийн бэлтгэлийн хамгийн чухал асуудал бол аятайхан хорт утааны баг олох явдал болж байх шив дээ.

Угаарын улирлыг яаж давна аа гэж бодохоос л хамар гашуу оргиж, шкафанд өлгөөтэй өвлийн хувцаснууд минь "муужирч" эхэлж байх чинь. Уг нь жил бүр л хотын даргын тайлан төлөвлөгөө, улсын эдийн засгийн баримт бичгүүд дээр "Агаарын бохирдлыг бууруулахад зарцуулсан" гээд нүд гүйцэж уншихааргүй олон оронтой тоо бичигддэг юм байна лээ. Юунд зарцуулсан нь даанч нүдэнд үл харагдаж, гарт үл баригдана.

Агаарын чанарын мэргэжлийн улсын алба нэртэй лут газар, агаарын бохирдлыг бууруулах өч төчнөөн төсөл хөтөлбөрүүд батлуулан энд тэнд туршлага судалж, хэрэгтэй хэрэггүй бохирдлын хэмжээг шүүдэг аварга том аппаратуудыг авчрах юм.

Тэртээ тэргүй иргэд нь муурч унаад, уушиг зүрхээрээ туршилтын туулай болж, эмнэлгүүд нь ачааллаа дийлэхгүй байхад хамраар орж байгаа нүүрсхүчлийн хийний юуг нь хэмжиж бахаа хангах гээд байгаа юм бол?

Болдог бол хий үрэгдэж байгаа татварынхаа мөнгөөр автомашины яндангуудад утаа бууруулагч зүүж өгөөд, халуун усаар паар нь халж, тогоор хоолоо хийдэг орон сууцнуудыг ахиухан барьж, нүүрс, түлж усаа зөөдөг гэр хорооллынхныг оруулаад, индүү, плитка, тень гурваа зэрэг ажиллуулахад буудаг тэнхээ муутай тогны асуудлыг нь шийдчихвэл ч Улаанбаатарт амьдарч болмоор.

Үнэ өртөг нь боломжийн бол хэн нүүрс түлж насаараа гэр хороололд амьдаръя гэж бодох вэ дээ. Агаарын бохирдлыг бууруулна гээд утаагүй түлш үйлдвэрлэлээ л гэхийн, хэрэглэж үзээгүй болохоор үр дүнг нь сайн мэдэхгүй ч түлж л байгаа хойно утаа гарах нь ойлгомжтой санагдана.

За энэ ч яахав. Манай агаарын бохирдолтой тэмцэх албаныхны ажлыг үнэлсэн нэг "чимэгтэй" мэдээ цацагдаж эхэллээ. Мексект болсон дэлхийн эрүүл мэндийн байгууллагын хуралдаанаар дэлхийн хамгийн бохир агаартай арван хотыг нэрлэхэд Азийн цагаан дагина гэж бидний өргөмжилдөг Улаанбаатар хот маань айргийн тавд орсон байх юм.

Арай л хойшоо бичигдээ юу даа, Уг нь эхний нэг, хоёрт бичигдэх байсан юм. Хэдэн сая хүнтэй Бээжинтэй хоёр сая хүрэхгүй хүн амтай Улаанбаатар өрсөлдөх ч хэцүү л дээ. Гэхдээ ийм дээгүүр бичигдэхэд чухал нөлөө үзүүлсэн сайд дарга нар, агаарын чанарын алба, төсөл хөтөлбөрийнхөндөө баярлалаа гэж хэлье. Шагналынхаа мөнгөөр ард иргэддээ хорт утааны аятайхан бас хямдавтар баг авчирна уу.